يا أهالي العبارة أصحاب الألف قتيل هي الدنيا كده هتعملوا إيه يالا مش أحسن ما كانت تيجي فيكم إنتم كمان وتتسجنوا يبقى موت وخراب بيوت ، يالا بقى معلش .
يا مسرح يا قومي إنت بتستعبط بتحط النار جنب الكبريت ليه وإوعى حد يتهم فاروق بيه بالإهمال ولا يحملوا مسئولية ولا تجيبوا سيرة ليه عشان الصدمة هتكون وحشة عليه وبعدين الراجل ده شايف شغله تمام وعايز يلبس طقية إسرائيل ويقلع نص نسوان البلد الحجاب ولا كلهم دي وجهة نظر تحترم ، ما أصل الشريعة اليومين دول بقت وجهات نظر ومتقوليش الوارد عن النبي صلى الله عليه وسلم ومذكور في صريح القرآن ،،، عمك فاروق حسني بيقول استفت قلبك ..
يا بنك القاهرة إيه يعني مليار و 400 مليون جنيه خدهم منك حسام بيه مش مشكلة يا عم يعني حسام بيه هيجي زي مين ولا مين ويعني مش معنى حسام بيه يعني هتدقق معاه يا عم دول تلميعة جزمة من جزم إصحابك .
يا عم حمادة عبد اللطيف يا بتاع مدرسة الجزيرة مش تخلي بالك بعد كده أديك اتصبت بشلل رباعي بس انت اللي غلطان في الليلة دي كلها وبعد كده ……… ولا أقول لك مش احسن ما كنت مت خالص أديك عايش وخلاص يا عم إيه يعني شلل رباعي إيه يعني …….
يا أهالي غزة إيه انتم مفكرين بلادنا سايبة ولا إيه بفضل الله إن كانت إسرائيل بتاعتكم دي هتحاصركم قيراط إحنا هنحاصركم أربعة وعشرين هو إنتم عايزن نفك الحصار عنكم علشان تحتلوا مصر ههاي دا بعدكم خليكم كده لا طايلين سما ولا أرض…
يا عم ابراهيم عيسى الله يكرمك متلعبش في عداد عمرك الباشا صحته زي الفل ولا فيه أي حاجة … مش مشكلة شهرين خلاص كده عدا منهم يجي شوية وهيخلصوا معلش استحمل بقى المهم الدستور لسة موجودة والحمد لله …
يا أهالي اسطبل عنتر إوعى من بيوتكم و متخافوش مصيركم زي مصير قلعة الكبش مش مهم الحكومة تخليكوا تسكنوا في بيوت المهم الحكومة تحافظ على صحتكم و إيه يعني لما تفضلوا في الشارع عشرين ثلاثين سنة ولا أربعين حتى هي الحكومة كل ما تهدم بيت واحد هتجيب ليه بيت تاني إيه هي هيصة هو انتم مفكرين نفسكم وزرا ولا ضباط فوقوا شوفوا انتم مين ؟
وسلامي لكل السياح هي دي مصر يا حبيبي إذا كان مش عارفة تجيب حقوق أهلها هتجيبلك حقوقك إمش ياد إنت وهو إنجروا من هنا ..
يا دكتور طارق يا سويدان إنت بتتعب نفسك ليه طنط إقبال بركة عالمة كبيرة في الشريعة والاقتصاد والسياسة والشئون الداخلية والخارجية للدول العربية وغير العربية والإسلامية وغير الإسلامية وكاتبة كبيرة وصحفية مشهورة وطبيبة أمراض نسا و طبيبة أمراض نفسية و متخصصة في شئون الأسرة و الطفل و مفتية شرعية ولها بفضل الله في كل شيء يعني لما تقول الواحدة تقلع الحجاب صدقوها التعدد حرام صدقوها يعني من الآخر لو قالت لرجالة مصر ونسوانها امشوا على دماغكم صدقوها الولية مبتصدقش الإمام البخاري صاحب أصح كتاب بعد القرآن هتقف انت قدامها يا دكتور طارق (( ألطم بحجرين ))
يا إخوان يا مسلمين يالا يا رجالة إيه رأيكم في العيد في السجن العسكري عيشة تمام صح ؟ … تعالوا بقى شوفوا سجن الباشا هشام طلعت … متهان ولا كأنه فيلا و لا حاجة دا حتى مفهوش داتا شو ولا فيه رقاصات ولا مغنيات مش بذمتكم ده ظلم … وفلوسكم مش رجعالكم …
يا أهالي سوزان تميم عوضكم على الله إيه يعني واحدة وراحت يعني هي هتيجي أفضل من مين يعني .
يا عم أيمن نور بطل بقى قلة كرامة أوباما مين و أمريكا مين رئيسك أولى بالرسائل دي …. هتقول بعت ألف رسالة هقولك انت غلطان مش تكتب العنوان صح وبعدين عمرك ما هتحفظ العنوان كل ما تكتب عنوان هنغير العنوان القديم …..
يا مصر الدنيا حالها اتشقلب ولا أقولك يا مصر إنت اللي واقفة على دماغك ليه ؟؟؟؟؟؟
